فتنہ انگیزی کی واضح دعوت . الازہر کی پیغمبر اسلام کی شان میں بھارتی ذمہ دار کے گستاخانہ بیانات کی سختی سے مذمت۔

الازہرالشریف ہندوستان میں بھارتیہ جنتا پارٹی کے سرکاری ترجمان کی طرف سے اپنے ٹویٹر پیج پر پیغمبراسلام حضرت محمد صلی اللہ علیہ وسلم اور آپ کی زوجہ ماجدہ حضرت عائشہ رضی اللہ عنہا کے خلاف گستاخانہ اور اہانت آمیز بیانات شائع کرنے کی شدید مذمت کرتا ہے۔

ان کے یہ بیانات تاریخ اور انبیائے کرام کی سیرت سے صریح جہالت کو ظاہر کرتے ہیں، جو کہ در حقیقت اخلاق اور فضیلت کی اعلیٰ ترین منزلوں کی نمائندگی کرتے ہیں، اللہ تعالی نے ان جیسی پاکیزہ ہستیوں کو برائیوں اور دیگر قسم کی غلطیوں میں پڑنے سے محفوظ رکھا ہے۔

الازہرالشریف نے اپنے بیان میں کہا کہ الازہر در حقیقت انسانیت کی ایسی عظیم ہستیوں کے بارے میں ان جاہلانہ بیانات کو ایک مضحکہ خیز امر سمجھتا ہے جنہیں وقتاً فوقتاً، اسلام اور مسلمانوں سے نفرت کرنے والا ہر شخص دہراتا رہتا ہے، علاوہ ازیں الازہر الشریف اس بات کی تصدیق کرتا ہے کہ ایسا طرز عمل ہی حقیقی “دہشت گردی” ہے جو پوری دنیا کو مہلک بحرانوں اور جنگوں میں غرق کر سکتا ہے۔
لہٰذا، عالمی برادری کو اس قسم کی بدسلوکی کرنے والوں کا مضبوطی، عزم اور پوری قوت کے ساتھ مقابلہ کرنا چاہیے۔

الازہر اس بات کی تصدیق کرتا ہے کہ حال ہی میں کچھ سیاسی عہدیداروں نے الیکشن میں ووٹ حاصل کرنے اور مسلمانوں کے خلاف اپنے پیروکاروں کے جذبات کو بھڑکانے کے لیے اسلام اور اس کے پاکیزہ پیغمبر (صلی اللہ علیہ وسلم ) کی توہین کے بارے میں جو کچھ کیا ہے وہ دراصل انتہا پسندی اور دیگر مذاہب و عقائد کے پیروکاروں کے ما بین نفرت اور فتنہ پھیلانے کی ایک کھلی دعوت ہے، اور ایسا کرنے والے نہ صرف انتہاپسند اور فتنہ و نفرت پھیلانے والے ہیں بلکہ بین المذاہب مکالمے کے اولین دشمن ہیں۔

الازہر ایک بار پھر اس بات کی تاکید کرتا ہے کہ آج کی مہذب دنیا کے ہر باشندے کا اولین فرض بنتا ہے کہ وہ سیاسی منفعت حاصل کرنے کی غرض سے مذاہب اور اعلیٰ ترین انسانی اقدار کی توہین کرنے والوں کے خلاف متحد کھڑا ہو۔