الرئيس السيسى فى افتتاح مصنع الرمال السوداء بكفر الشيخ: موضوع الرمال السوداء اتعرف فى مصر منذ 90 عاما ..ومتاح للقطاع الخاص العمل والاستثمار فى المشروع ..ولاتأثير صحى على العاملين فيه
قال الرئيس عبد الفتاح السيسى،رئيس الجمهورية أن مشروع الرمال السوداء، ننتظره من فترة طويلة، قائلا: “انتظرنا المشروع ده فترة كبيرة أوى.. خلال أكثر من 3 سنوات.. ووصول المعدات خلال الفترة الماضية”.
وأضاف الرئيس السيسى، خلال كلمته فى افتتاح مصنع الرمال السوداء فى كفر الشيخ: “انا بقول الكلام ده للقطاع الخاص والشركات اللى اشتغلت معانا فى هذا المجال زى حسن علام وغيره.. انت عرفت المسار.. ده مسار خد وقت طويل فيه.. المكونات والطرح والكلام اللى بيتعمل علشان وصول المعدات.. ثم 60 % منتجات تتعمل فى مصر والباقى يجى من الخارج”.
وتابع الرئيس السيسي: “لما كنا بنعمل المشروع بتاع الرمال السوداء.. ده سألت سؤال حجم الاحتياطات اللى موجودة هنا تكفى قد ايه وحجم الطلب العالمى عليه قد ايه.. هل فيه فرصة لمشروع و2 و3.. الطلب هو اللى بيتحدد.. وبقول وبسمع للقطاع الخاص.. من أول المشروع ده.. متاح للقطاع الخاص الدخول فيه.. اللى عاوز يتفضل.. وده بقوله فى كل مشروع يتم افتتاحه.. حد يقولى مش قولت له من الأول.. الفرصة دى كانت موجودة على مدار 40 و50 سنة”.
وتحدث الرئيس عبد الفتاح السيسي، معلقا على كلمة الدكتور حامد ميرة رئيس هيئة المواد النووية، قائلا: “عاوزين نوضح للناس في مصر نعرف الحكاية دي.. بدأت امتي كتاريخ.. لفهم واكتشاف الموضوع ده في مصر.. يعنى عاوز أقول كان من 80 و90 سنة.. وعاوز أقول لما اتكلمنا في الموضوع ده من 5 سنين.. محدش كتير شجعنا كفكرة”.
وأضاف الرئيس السيسي،: “دراسات الجدوي للمشروع خدت 3 سنين.. ومين هيدفع تمن حاجة زي كده.. بقول الكلام ده للمصريين.. بعد ما عملنا الفكرة دي وخدنا المسار ده .. اشرح للناس يا دكتور حامد.. اشرح للناس علشان يفهموا الموضوع ده اكثر.. يمكن الناس اول مرة تسمع حاجة عن الرمال السوداء”.
وأكد الرئيس على ضرورة الاهتمام بالحفاظ على العاملين في مشروعات الرمال السوداء، قائلا: “لو محتاجين أي مواد للارتداء من قبل العاملين للحفاظ عليهم صحيا.. إحنا مستعدين نعمل ده.. نبقي حرصين أكثر.. علشان في النهاية”.
وأضاف “اللى شغال في المشروع ده مش شغال يوم ولا شهر.. عاوزين نكون مطمئنين.. أن الشغل ده ليس له أي تأثير صحي من خلال الإجراءات والمعايير والاحتياطات اللتى ممكن نحققها”.