الرئيس السيسي للمزارعين “الأرز اللي بشتريه منكم بيروح للتموين.. وموصلناش من القمح سوي ٣.٥ مليون طن”
9 مليون ضيف عايشين معانا.. وفى الـ 7 أسابيع اللى فاتوا عبر 220 ألف سوداني لمصر
حرص الرئيس عبد الفتاح السيسي، على مخاطبة الشعب المصري خلال زيارته لقرية الأبعادية بمحافظة البحيرة، ووجه رسالة للمزارعين قائلا: “الأرز اللي بشتريه منكم بيروح للتموين.. والتموين بيمس 70 مليون مصري، والمزارعين لما لقوا فرصة أحسن باعوه! رغم إني كنت باخد الأرز وأبيعه مدعم”.
وفيما يتعلق بالقمح، قال الرئيس السيسي في كلمته: “الإنتاج في مصر ممكن يبقى 8 أو 9 أو 10 ملايين طن.. وحد يقولي أصل إحنا في ريف، عندنا القمح في البيت بنعمل بيه مناسبات.. اللى خدناه لحد الآن 3.5 مليون طن يبقى لسه في البيوت فيه 6.5 مليون طن، طب المخابز بتاعة الناس بتبيع للناس كلها، الرغيف بيتكلف 80 قرش وببيعه بـ5 قروش، وأنا مش باخده هبيعه بتمنه، لكن لو حد تاني خده هيتاجر فيه”.
وأكد الرئيس السيسي، أنه يحرص على ألا يقل الاحتياطي السلعي عن 5 و 6 أشهر، قائلا: “حرصنا على الاحتياطي مايقلش عن 5 أو 6 شهور، يعني رصيد الرز والقمح والزيوت واللحوم والدواجن ماتقلش عن 6 أشهر علشان ما تحصلش أزمة، وأنا كنت هاخد القمح بالسعر اللي قلت عليه وهديه للناس مدعم بـ5 قروش، ولو أنا النهارده مالقتش الطلب ده موجود في الـ10 ملايين طن اللى فى مصر، هضطر أشتري من بره والموضوع ده هيبقى له تأثير كبير على الأسعار في مصر بسبب الدولار.. كل ما يكون فاتورتي من الدولار في تزايد، سيكون هناك عبء على الاقتصاد”.
قال الرئيس عبد الفتاح السيسي، إن مصر يعيش بها نحو 9 ملايين ضيف، موضحًا: “نتيجة فضل الله علينا والأمن والسلام اللى عايشين فيه… فيه 9 مليون ضيف وفى الـ 7 أسابيع اللى فاتوا عبر نتيجة الظروف فى السودان أكثر من 220 ألف إنسان دخلوا علشان الظروف الموجودة”.
وأضاف الرئيس السيسي على هامش جولته بمحافظة البحيرة: ” بالمناسبة للأشقاء فى السودان وأى بلد تانى ..خلوا بالكم من بلدكم.. وبقول الكلام ده لأنى شوفت لما حصل مشاكل في بلاد أخرى الناس مقدرتش تقعد وسابت بلدها وجت عندنا وراحت حتت تانية ..مش هقول دول علشان ما احرجش حد.. لكن اعرفوا أن الدول اللى حصل فيها مشاكل واقتتال جه منهم عندنا ملايين هنا عايشين معانا.. طيب احنا ظروفنا صعبة.. كنا ممكن نقول لا.. ولكن بيخشوا المدارس بتاعتنا والمستشفيات وبنتشارك الموجود .. واللى موجود مش كتير .. لكن احنا بنتشارك فيه”.
قال الرئيس عبدالفتاح السيسي، إن مصر تعيش أزمة منذ 3 سنوات، حيث بدأت بموضوع كورونا، متابعا:” ده طبعا كان له تأثير كبير قوى على مصر والعالم واحنا في مصر موقفناش، طيب جت الأزمة الروسية وكان ليها تأثير كبير علينا وعلى الاقتصاد العالمي؟ ..أيوه.. يمكن تكون بطأتنا شوية، يمكن تكون غلت الأسعار وغلتها كتير، بس عاوز أقولكم على حاجة، خلوا بالكم برضو في الـ 3 سنين اللى فاتوا زدنا 6 مليون، مقصدش بالكلمة دي أى حاجة، لكن بحط الصورة جنب بعضها”.